Volgens Marietjie Jacobs, bestuurder van die KLK-vulstasies en Express-geriefswinkels, is hulle tevrede met die omset. Hulle adverteer op sosiale media en sal eersdaags ook strooibiljette in die stad versprei.

KLK Express se heerlike koffie is tans dié gonswoord in die dorp; daar is reeds gereelde klante wat elke oggend hul koppie kom kry. Ingevoerde koffiebone van Dallmayr Café & Bar word gebruik. Klante kan uit ’n verskeidenheid drinkgoed kies – daar is  onder meer cappuccino, Americano, latte macchiato en filterkoffie – maar Marietjie beveel die creamy hot chocolate ten sterkste aan.

Nog ’n lipleklekker trekpleister is natuurlik dié geriefswinkel se tuisgemaakte beesstert en skaapvleispasteie. Voorts kan inwoners en reisigers deur die dorp talle ander geriefsprodukte hier kry.

Die konsep van die geriefswinkel is in geheel deur die argitekmaatskappy De Kock en vennote ontwikkel en uitgevoer. Al die ander werk is waar moontlik deur plaaslike kontrakteurs gedoen. Marietjie bedank almal betrokke vir hul insette.

KLK Express het tien vriendelike personeellede wat daagliks van 6:00 tot 19:00 regstaan om klante te bedien.